සිංහයන් කිලිනොචිචියේ – ජයවේවා !

ප්‍රභාකරන් ගේ සිහින ඊලාමි රාජ්‍යයේ සිහින ‍බොදකර ලමින් අපේ වීරෝධාර රණවිරුවන් කොටි ත්‍රස්තවාදීන් ගේ ප්‍රධාන බල කොටුව වු කිලිනොචිචියේ බලය ඊයේ තහවුරු කර ගත් අවස්ථාවයි මේ.

මුලු ජාතියේම ආශිර්වාදය රණවිරුවන් වෙත පිදෙන මේ අවස්ථාවේ අපේ එකම පැතුම වන්නේ කුරිරු ත්‍රස්තවාදීන්ගෙන් අපේ  රට ඉක්මනින්ම මුදාගැනීමට ශක්තිය ලැබේවා යන්නයි.

අපේ විරුවන්ට ජය වේවා !

හමුදාව කිලිනොච්චිය ජය ගනී

එල්.ටී.ටී.ඊ. ත්‍රස්තවාදීන්ට ඔවුන්ගේ ඉතිහාසයේ දරුණුම පරාජය අත් කර දෙමින් කිලිනොච්චි නගරයේ බලය අත්පත් කර ගැනීමට වීරෝදාර ආරක්ෂක හමුදාවන් අද (ජන 02) උදෑසන සමත් විය. ‍

යුද හමුදාවේ 57 වන සේනාංකයේ භට පිරිස් සහ කාර්ය සාධක බළකා 1 හි භට පිරිස් මෙම ඓතිහාසික ජයග්‍රහණය සනිටුහන් කිරීමට සමත් විය. සති ගණනාවක් පුරා පැවති දරුණු ගැටුම් වලින් අනතුරුව කිලිනොච්චිය කොටි ත්‍රස්තවාදීන්ගෙන් මුදවා ගැනීමට යුද හමුදාව සමත් විය.

මේජර් ජෙනරාල් ජගත් ඩයස්ගේ නායකත්වය යටතේ මෙහෙයුම් දියත් කළ 57 වන සේනාංකය කිලිනොච්චි නගරයට දකුණු සහ නිරිත දිශාවන්ගෙන් නගරයට ඇතුල් වූ අතර බ්‍රිගේඩියර් ශවේන්ද්‍ර සිල්වාගේ නායකත්වයෙන් යුත් කාර්ය සාධක බළකා 1 හි භට පිරිස් කිලිනොච්චි නගරයට උතුරු දෙසින් සහ වයඹ දෙසින් ඇතුල් විය.

කොටි ත්‍රස්තවාදීන්ගේ ඊලාම් සිහිනයේ ප්‍රධානතම බලකොටුව ලෙස සැලකූ කිලිනොච්චිය නගරය ත්‍රස්තවාදීන්ට අහිමි වීම ඔවුන් ලද විශාල පරාජයකි. කොටි ත්‍රස්තවාදීන් තම ප්‍රධානතම පරිපාලන නගරය ලෙස සලකනු ලැබුවේ ද කිලිනොච්චි නගරයයි.

මහා ආරක්ෂක පස් බැමි නිර්මාණය කර කිලිනොච්චිය ආරක්ෂා කර ගැනීමට කොටි ත්‍රස්තවාදීන් දැරූ සියලු උත්සාහයන් ව්‍යර්ථ කිරීමට වීරෝදාර ආරක්ෂක හමුදාවන් සමත් විය. කිලිනොච්චි මුදා ගැනීමේ මෙහෙයුමේ දී එල්ල කළ හමුදා ප්‍රහාර හමුවේ කොටි ත්‍රස්තවාදීන් විශාල සංඛ්‍යාවක් මිය ගිය අතර තවත් විශාල සංඛ්‍යාවක් තුවාල ලබා තිබේ.